Lancelot du Lac (Anonymous)

Onques par amors n'avoit aimé c'une foiee, et qant l'an li demandoit por quoi il avoit amors laissiees, si disoit por ce qu'il baoit a vivre longuement.
" Comment, sire ? faisoient si home, dont ne puet il vivre longuement qui par amors aime ? "
Et il disoit que nenil.
" Por quoi, sire ? " faisoient il.
" Por ce, fait il, que cuers de chevalier qui finement aimme ne doit baer qu'a une chose : c'est a tot lo monde passer ; ne nus cors d'ome, tant fust preuz, ne porroit soffrir ce que li cuers oseroit emprandre, que ançois ne lo covenist fenir. Mais se la force del cors fust si granz que ele poïs aconplir les hardemenz del cuer, ge amasse par amors tote ma vie et passasse toz les prodomes de totes iceles proesces qui puent estre en cors de boen chevalier, car il ne puet estre tres preuz d'armes, se il n'aimme tres leialment, et ge conois tant mon cuer que ge amasse leiaument sor toz leianz. "

" Et garde que tant com tu seras en enfances, se tu ies en leu o l'en consaut de granz affaires, que ja [ta] parole n'i soit oïe ne tes consauz jusqe la que [tuit] li plus ancien de toi avront parlé. Et se tu viens en bataille o en poigneïz de guerre ou en leu nul ou granz chevalerie soit assenblee, garde que ja n'i atandes plus juene ne plus viel de toi, mais fier devant toz les autres des esperons por faire un biau cop, la ou tu porras ataindre, car a pris et a honor d'armes conquerre ne doit nus atandre, ne lo juesne ne lo veillart. Mais as granz consauz doner doivent li anfant entendre les plus meürs. Et tant saches tu bien de voir, tres granz honors gist en morir par hardement et par proesce, et granz hontes et granz reproches vient en dire fole parole et fol consoil. "

" Et neporqant il n'a pas tant en chascun com l'an i cuide, o soit de mal, o soit de bien. "

" Sire, fait messires Gauvains, certes il est bien raisons que vos i pensoiz en leu et en tans que li pensez porra valoir. Mais totes hores n'est il pas tans de faire duel, mais qant vos verroiz qu'il en sera et leu et tans, si i metez avoc lo pensé painne et travail. "

" Et si garde que tu portes ton cuer avoc ta boiche, car la confessions n'est preuz se li cuers n'est repantanz de ce que la langue regeïst. "

" Et se li fol lo t'atornoient a mal, ne t'an chaille, car li blasmes do fol dechiet, et li lox del sage croist et anforce. "

" Li Sages dit que autresi liez doit estre li donneres an son don con est cil cui an lo done. L'an ne doit mie doner a laide chierre, mais tozjorz a lié sanblant, car dons qui est lieement donez a deus paires de merites, et cil qui est donez an rechinant n'a nul guerredon. Et si i a autre raison por coi tu ne devroies ja estre las de doner ; car tu sez bien que par doner ne puez tu estre destruiz, mais tu puez aler a mal par trop tenir, car nus ne fu onques destruiz par largece, mais plusor ont esté essilié par avarice. Totjorz done assez, et assez avras qoi, car qanque tu donras remandra en ta terre, et de maintes autres terres te vanront li avoir an la toe. Ne ja doners ne faudra tant com tu voilles, car li orz ne li argenz de ta terre ne sera ja par toi husez, ainz husera il toi autresi come l'eive huse la roe del molin. Por ce, a doner doiz entandre sanz lasser, et se tu ensin lo faisoies, tu guaigneroies et l'enor del siegle et les cuers de tes genz et l'amor de Nostre Seignor. "

" Et si te deviserai qui est li Mires sanz Mecine. Ce est Dex, ne nus autres mires sanz mecine n'est que il seus ; car tuit li autre mire, tant de bien com il a an aus des maladies conoistre qui sont es cors et de savoir la garison, itot ce font par lo san que il ont qui de Deu descendié et qui la force mist as herbes par coi il porchacent la garison au cors. Ne garison ne sevent il faire se au cors non ; encor n'est ce mie a toz, car maintes foiz avient que qant il ont mises totes les paines a un cors garir, si se muert il. Et s'il avient qu'il puisse garir les maladies des cors, si n'ont il nul pooir de garir les maladies des ames. Mais Dex en est puissanz, car si tost com uns huem vient a veraie confession, ja tant n'iert chargiez de vil pechié que Dex nel regart. Et si tost com il l'avra regardee, ja puis n'i covandra autre mire, ne lier anplastre, ainz est la plaie nete et seine si tost com il l'a regardee. Icist est Mires sanz Mecine qui ne met an plaies ne des armes ne des cors nule mecine, ainz est toz seins et nez par son douz regart. Mais ansi ne font mie li mortel mire, car qant il ont les maladies veües, si lor covient aprés querre les herbes et les mecines qui a cele maladie covient, et a la feiee est tot perdu quant la morz mostre sa seignorie. Mais cil est verais mires qui par son regart solement done santé as malades de l'ame et del cors, et fait esloignier la mort del cors tant comme lui plest, et garist a totjorz de la mort de l'ame. Est ce Mires sanz Mecine. "

" Or te dirai donc qui cele flors est et coment ses conseuz te sauvera. Cele flors est flors de totes les autres flors. De cele flor nasqui li fruiz de qoi totes choses sont sostenues. C'est li fruiz don li cors est sostenuz et l'ame paüe. C'est li fruiz qui saola les cinc mile homes en la praerie qant les doze corboilles furent anplies del reillié. Ce est li fruiz par coi li pueples Israel fu sostenuz quinze anz es desserz, la ou li om, ce dit l'Escripure, manja lo pain as angles. Ce est li fruiz par coi Josep de Barimathia et si compaignon furent sostenu qant il s'an venoient de la terre de promission an ceste estrange païs par lo comendement Jhesu Crist et par son conduit. Ce est li fruiz don Sainte Eglise est repaüe chascun jor. Ce est Jhesu Criz, li Filz Deu. C'est la flors de cui doiz avoir lo consoil et lo secors se tu ja mais l'as. C'est sa douce Mere, la glorieuse Virge, dont il nasquié contre acostumance de nature. Cele dame est a droit apelee Flors, car nul fame ne porta onques anfant devant li ne aprés qui par charnel asemblement ne fust ançois desfloree. Mais ceste haute dame fu virge pucele, et avant et aprés, c'onques la flor de son pucelaige ne perdi. Bien doit dons estre apelee Flors de totes autres flors, qant ele garda sa glorieuse flor saigne et antiere, la ou totes les autres flors perissent, ce est au concevoir et an l'anfanter, et qant de lui nasquié li Fruiz qui done vie a totes choses. Par ceste Flor vanras tu au verai consoil, car ele te racordera a son douz filz et t'anvoiera lo secors qui te fera recevoir honor que tu as comenciee a perdre. Et se tu par ceste Flor ne viens a sauvement et d'arme et de cors, par autrui n'i puez tu venir, car nus ne tient si grant leu vers lo Sauveor comme ele fait. Ele ne cessera ja de proier por les chaitis. Et se tu ceste Flor enores, li conselz de li te gitera de toz periz. "